Dontū kanalu gīdīms Klaipieduo
Endodontėnis gīdīms, lēdontis ėšsauguotė sava donti, ka pažeista pulpa. Skėrts pacijėntams so skausmo, jautromo, isėseniejosė infekcėjė a po nasiekminga onkstesnė gīdīma.
Kas īr dontū kanalu gīdīms?
Dontū kanalu gīdīms (endodontėjė) īr procedūra, par katron pašalėnama pažeista ar ožkriesta dontėis pulpa (nerva audėnīs), kroupštē ėšvaluomė i sterilėzoujemė šaknū kanalā, vieliau anėi sondarē ožplomboujemė specelė medžega (gutaperča). Tas lēd ėšsauguotė natūrali donti, katras kėtēp torieto būtė pašalints.
Mėška klinėkuo dėrbam so mašėnėnēs nikelė-titana instrumėntās, katrėi īr žīmē efektīvesnė ėr tėkslesnė nego senesnės ronkėnės sistemas. Sodietingās a pakartuotėnė gīdīma (pargīdīma) atvejēs nauduojem dėntalėni mikroskuopa, lēdonti pamatītė i pluonus, papėlduomus a kalcifėkoutus kanalus. Vėsos gīdīms atlėiktams po koferdamo, izolioujont donti nu seiliu i bakterėju.
Po siekminga kanalu gīdīma dontis tonkē pasėdara trapiesnis, tudie rekomėndoujem anon apsauguotė vainėkelio. Tas ožtėkrėn, ka ėšgelbiets dontis tarnauto na kelis, vo daug metu.
Endodontėjė mūsa klinėkuo dažniausē atlėikt gīd. Rasa Smėlgevīčienė, katra i šion srėti gėlėnas nu studėju baigėma Vėlniaus universitetė.
Kumet rēk?
- Stėpros, pulsoujontis dontėis skausmos: labiausē nakti arba nu karšta maista.
- Užsėtėsės jautroms šalčiou a karščiou: ka diskomfuorts trunk ėlgiau nego kelės sekundės po sodėrgėnėma.
- Papotosi dontėna a pūlėnoks: šalėp dontėis matuoms gozielis a dontėnas paraudėms.
- Gėlos kariesos: jiedounis pasėik nerva ėr īprasta plombavėma naožteks.
- Dontėis trauma: nu smūgė pažeists nervs, dontis pajoudou arba praded jodietė.
- Pakartuotėnė infekcėjė: onkstiau gīdīts dontis apėnt praded skaudietė a matuoms pūlėnoks šaknėis vėršūnie.
- Roušontėis protezavėmou: ka dontis būs dėngams vainėkelio, vo pulpa pažeista.
Procedūras etapā
- 1
Apžiūra ėr rėntgėns
Ivertėnam dontėis būklė, atlėiktam dėntalėnė nuotrauka, sodietingās atvejēs – 3D KKT, ka matītomem kanalu anatuomėjė.
- 2
Vėitėnė najautra
Dontis ėr aplinka noskausmėnamė, ka par procedūra najaustumiet nikuokė skausma.
- 3
Izoliacėjė koferdamo
Dontis gumėnio audėnio izolioujems nu seiliu i bakterėju. Ta sterėloma pagrinds.
- 4
Pulpas pašalėnėms ėr kanalu valīms
Mašėnėnēs „Niti“ instrumėntās kroupštē ėšvaluom i soformoujem šaknū kanalus, sīkio skalaunam antiseptėnēs tėrpalās.
- 5
Tarpėnis gīdīms (jē rēk)
Esont infekcėjē, i kanalus dedams kalcė hidroksids, dontis užplomboujems laikėnā 1–2 savaitiems.
- 6
Galotėnis kanalu plombavėms
Ėšvalītė kanalā sondarē ožpėlduomė gutaperča i silerio, atlėiktams kontruolėnis rėntgėns.
- 7
Dontėis atkūrėms
Ožplomboujema vainėkėnė dalis, vo jē dontis stėprē pažeists, planoujem vainikieli arba kaištėni īkluota.
Kanalu gīdīma tipu palīgėnėms
| Tips | Kumet rēk | Sodietingoms | Kaina | Trokmie |
|---|---|---|---|---|
| Pėrmėnis gīdīms | Dontis gīduoms pėrma sīki, kanalā švarė | Vėdotėnis | 60–80 € ož kanala | 1–2 vizitā |
| Pargīdīms (endo retreatment) | Onkstiau gīdīts dontis apėnt skaud, lėikt infekcėjė | Aukšts, rēk ėšvalītė senas medžegas | nu 140 € ož kanala | 2–3 vizitā |
| Gīdīms so mikroskuopo | Ožkalcifėkoutė kanalā, papėlduomė kanalā, instrumėntu lūžē | Aukščiausis | 100 € ož valonda papėlduomā | Kelė vizitā, ėlgiesnis darbs |
Dontū kanalu gīdīma kainas
- Šaknėis kanala pėrmėnis chemomechanėnis paroušėms (ėšvalīms) ož vėina kanala 60–80 €
- Šaknėis plombavėms gutaperča ož vėina kanala 60–80 €
- Šaknėis kanala ėšvalīms pargīdont ož vėina kanala nu 140 €
- Gīdīms kalcė hidroksido (vėins kanals) 30 €
- Gīdīms mikroskuopo ož valonda 100 €
- Dėntalėnė rėntgėna nuotrauka 10 €
Vėsa kainuorašti rasėt če. Tėkslė kaina patvėrtinsem po apžiūruos.
Priežiūra po dontū kanalu gīdīma
Po kanalu gīdīma dontis kelės dėinas gal būtė jautriesnis spaudėmou, labiausē kromtont. Ta normali audėniū reakcėjė, ana palaipsniou praēn par 3–7 dėinas. Skausmou malšintė tink īprastė vaistā ibuprofena a paracetamuolė pagrindo.
- Pėrmas paras vėnkėt kromtītė gīdīta posė, labiausē kėita maista.
- Jē dontis ožplombouts tik laikėnā, sauguokėt anon, ka plomba naėškrėsto. Ėškrėtos, kreikėties i klinėka.
- Tėskėt kasdėinė bornuos higiena, dontū siūlo nauduokėties atsargē.
- Jē jautaut stėpriejonti pulsoujonti skausma, papotėma a karščevėma, nadelsdamė sosėsėikėt.
Po galotėnė plombavėma svarbo donti apsauguotė nu lūžė. Daugelio atveju rekomėndoujem oždietė vainikieli, labiausē kromtomīsims dontims. Regolerė profėlaktėnē vizitā kas 6 mienesius paded stebietė, kāp kanalā gīn: kontruolėnė rėntgėna nuotrauka paprastā daruom praējos 6–12 mienesiu po gīdīma.
Dielkuo rinktėis Mėška odontuoluogėjės klinėka dontū kanalu gīdīmou?
- Endodontėjės specelizacėjė: gīd. Rasa Smėlgevīčiēnė nu studėju baigėma VU tėkslingā gėlėnas i kanalu gīdīma.
- Mašėnėnē „Niti“ instrumėntā: efektīviesnis i kuokībėškiesnis kanalu formavėms nego ronkėnė technėka.
- Dėntalėnis mikroskuops: sodietingās atvejēs matuom papėlduomus, kalcifėkoutus kanalus a lūžosius instrumėntus.
- Darbs po koferdamo: izoliacėjė nu seiliu i bakterėju, katra tėisiuogē lem gīdīma siekmė.
- Komandėnis darbs: po endodontėjės sīkio so gīd. Lauro Smėlgevīčio soplonoujem dontėis protezavėma, ka rezoltats tarnauto metus.
Gīdītuojė odontuoluogė Rasa Smėlgevīčienė api dontū kanalu gīdīma (endodontėjė):
Šaknū kanalu gīdīms, mon ruods, vėina ėš sodietingiausiu odontuoluogėjės srėčiū… Sonkomu če ėškīl daug.
Pavīzdžiou, tonkē pacijėnts krēpas so skaudončiu dontimi, kelės naktis namėiguojės, pavargės, vaistū prirėjės – skaud tėik, ka, ruods, galva plīšt… Arba atvėrkštē, nieka žmuogos najaut, vėskas anam gerā, bet ėš rėntgėna nuotraukas matītė, ka pūlėnoks snaud… Gīdītė rēk, bet žmuogos nanuor, jug naskaud. Tumet mon lėikt tik atsėduksietė.
Gerā bėnt tėik, ka šēs laikās jau turem priemuoniu pacijėntou efektīvē padietė, bet gīdīms brongos, trunk ėlgā, rēk na vėina vizita.
Gīdont kanalus, dėdlē svarbo kroupštoms, če napriskobiesi, darbs tor būtė atlėkts milimetru tėkslomo. Kartās atruoda, krapštā krapštā tus kanalus, tėisiuog meldīs pasėlėnkės pri tuo dontoka, bet gala namatītė. Vo labiausē, ka rēkalings endodontėnis pargīdīms. Kuo mes tik tūs kanalūs narondam…
Onkstiau mūsa kolegas natoriejė tuokiū galėmībiu, kuokės mes torem šindėin, tudie dėdlē tonkē tenk pargīdītė senē gīdītus dontis, nuoront anus ėšgelbietė nu traukėma. Bet, dejė, na vėsumet pavīkst, vo prėižasčiū daug, nabsėplieso.
Tudie daugelie Euruopas šaliū jau formoujes tuokė praktėka: „ai, kam če vargtė, lopam laukon, sokam implanta i baigts kriukis!“ Bet, mona galva, ta nier teisingiausis kels – nikuoks implants naatstuos savuojė dontėis šaknėis. Ta, jē tik īr galėmībė ėšsauguotė donti, kvėito rinktėis sunkiesni keli.
Dėdlē džiaugiaus, kā isėtaisiem mašėnėnius instrumėntus kanalams valītė. Gīvenėms endodontėjės pasaulie bėški prašvėisiejė, darbs pasėdarė daug efektīviesnis, grētiesnis, dā kuokībiškiesnis. Tēp, gal pacijėntou kaina naatruoda džiogėnonti, bet ana pagrīsta: instrumėntā brongė, adatelės panauduoji kelis sīkius i meti laukon… Bet tēp, kap dėrbau pradžiuo, priš dešimt metu, jau nabgaliečiau. 😊
Klinėkuo stėngamuos dėrbtė kap komanda. Vo aš jau nu pat studėju baigėma Vėlniaus universitetė tėkslingā gėlėnaus i endodontėjė, važiavau i kursus, tuobolėnaus, gaudžiau vėsuokės naujīnas, tudie endodontėnis gīdīms tonkē ėr nogol ont mona pečiū.
Gīdītuojė odontuoluogė Rasa Smėlgevīčienė
Dontū kanalu gīdīms: klausēmā ėr atsakīmā
Kuokė īr dontū kanalu gīdīma kaina?
Kas īr dontū kanalu gīdīms (endodontėjė)?
Kumet rēkalings kanalu gīdīms?
A endodontėjė skausminga?
Kėik laika trunk dontū kanalu gīdīms?
A dontis po gīdīma būs sėlpniesnis?
Kėik laika tarnau gīdīts dontis?
A gal ėšvėngtė kanalu gīdīma?
A gal gīdītė kanalus, jē dontis jau bova gīdīts onkstiau?
Kou skėras gīdīms so mikroskuopo nu īprasta?
A kanalu gīdīms gal sokeltė komplėkacėju vėsam orgonizmou?
A gal gīdītė kanalus par nieštoma?
Sosėjosės paslaugas
Rēkalings dontū kanalu gīdīms Klaipieduo?
Kvėitam sosėtėktė, atsakīsem i vėsos rūpamos klausėmos ėr padiesem rastė geriausi sprėndėma.
Ožsakītė paslauga